Bloulig-tiener wéér in hospitaal
2011-12-23 10:45
Johannesburg – Thomas Ferreira, die 18-jarige seun wat breinskade opgedoen het nadat hy ses weke gelede deur 'n ampsvoertuig getref is, is weer in die hospitaal nadat hy 'n virus opgedoen het, het The Star Vrydag berig.
Ferreira, wat in 'n rehabilitasiesentrum versorg word, het 'n hoë koors ontwikkel en is omstreeks 14:00 Donderdagmiddag in die Krugersdorp-hospitaal opgeneem.
"Hy het 'n hoë koors en hulle het besluit dit is beter dat hy teruggaan hospitaal toe," het Paul Ferreira, sy pa, gesê.
Thomas is op 5 November op sy motorfiets omgery deur die bloulig-voertuig van Humphrey Mmemezi, LUR vir plaaslike regering en behuising. Hy het erge kopbeserings opgedoen en is met swelling en bloeding op die brein in die waakeenheid van die Krugersdorp-hospitaal opgeneem.
Nomvula Mokonyane, Gautengse premier, het toe onderneem om die tiener se mediese rekeninge te betaal.
Die koste van die rehabilitasiesentrum waarheen Thomas verlede Maandag verskuif is, beloop R120 000 'n maand.
– Volg Nuus24 op Twitter
- SAPA