Bloulig-tiener maak goeie vordering
2012-01-23 10:00
Johannesburg – Thomas Ferreira, die matriekleerder wat kritiek beseer is nadat hy in November deur ‘n bloulig-voertuig getref is, is besig om wonderbaarlik te herstel, het berigte Maandag gelui.
Ferreira het ‘n week gelede vir die eerste keer gepraat en “hallo” gesê, het The Times berig.
Dit volg nadat dokters oorspronklik gedink het hy sal permanente breinskade hê.
Die 18-jarige, wat tot twee weke gelede in ‘n koma was, het ten tyde van die ongeluk op sy motorfiets in Krugersdorp gery.
Hy is deur ‘n motor wat die LUR vir behuising, Humphrey Mmemezi, vervoer het getref terwyl die motor se blou lig aan was om oor ‘n rooi verkeerslig te ry.
The Times het sowat ‘n week gelede nog berig dat Ferreira, wat ‘n leerder by die Bastion Hoërskool is en as gevolg van die ongeluk nie sy matriekeindeksamen kon skryf nie, slegs kapokaartappels kon inneem.
Daar is berig dat hy onlangs tydens ‘n familie-piekniek twee boereworsrolle en ‘n glas vrugtesap gehad het.
Hy is sedert 30 Desember by die Riverfield Lodge-rehabilitasie-eenheid in Randburg.
“’n Paar dae gelede kon hy nie eers enige emosie toon nie,” het sy pa Peter gesê.
“Dit gaan nog ‘n baie lang pad wees. Dokters sê dis nog moeilik om te sê (of hy ten volle sal herstel). Maar ons hoop dat hy teen die einde van Maart sal terugkeer huis toe.”
Tydens die piekniek het Thomas se ma Priscilla haar seun glo gehelp om op te staan en ‘n paar treë na sy rolstoel te neem.
“Hy ontwikkel selfs ‘n goeie eetlus. Hy het voor die ongeluk 70 kg geweeg en het na 49 geval toe hy vir rehabilitasie opgeneem is. Maar hy tel stelselmatig gewig op,” het sy gesê.
– Volg Nuus24 op Twitter
- SAPA