Bloulig-lyfwag in hof
2011-10-10 22:45
Johannesburg – ‘n Lid van ‘n BBP-beskermingseenheid wat daarvan aangekla word dat hy op ‘n voertuig geskiet het, het aan die Pietermaritzburg-landdroshof gesê hy het skote afgevuur omdat die bestuurder ‘n bedreiging was.
Konst. Hlanganani Nxumalo, lyfwag vir Meshack Radebe, LUR vir maatskaplike ontwikkeling in KwaZulu-Natal, het erken hy het skote afgevuur tydens die voorval, wat landwyd opslae gemaak het.
Agt mense is beseer in die ongeluk in 2008.
Nxumalo was saam met sy kollega, Caiphus Ndlela, toe die voorval plaasgevind het. Hulle was op pad om Radebe in Hammarsdale te gaan haal.
Hy het na bewering die band van ‘n Mazda-motor naby Camperdown stukkend geskiet. Dit het daartoe gelei dat die bestuurder beheer oor die motor verloor en in die pad van aankomende verkeer beland het. Die motor was toe in ‘n kop-aan-kop-botsing met ‘n bakkie betrokke.
Nxumalo het aan die hof gesê dat die bestuurder van die motor ‘n bedreiging vir hulle ingehou het en dat hy probeer het om hulle van die pad te stamp.
Hy het gesê hy het aan die bestuurder beduie om stadiger te ry, maar dat die bestuurder vir hom ‘n middelvinger-gebaar gewys het.
Volgens Nxumalo het hy sy geweer uitgehaal en waarskuwingskote afgevuur toe dit duidelik word die bestuurder sal nie uit die pad kom nie.
Op ‘n vraag oor waarom hulle nie verby die ander motor gery het nie, het Nxumalo gesê hy kon nie antwoord nie, aangesien hy nie bestuur het nie.
Die verhoor duur voort. Ndlela sal na verwagting Dinsdag getuig.
- Volg Nuus24 op Twitter
- SAPA