Blou Bul glo afgepers
2010-09-02 06:33
Pretoria – Die Blou Bul-stut Bees Roux het ná ’n beweerde besope kuieraand in onder meer ’n berugte ontkleeklub in Pretoria vermoedelik in die hande van ’n afperser in die metropolisie beland.
Roux het tot in die vroeë oggendure in die klub Flamingo’s in Kerkstraat gekuier voordat hy deur Tshwane-metropolisielede afgetrek is.
Ná ’n voorval waarin een van dié lede dood is, is Roux in hegtenis geneem weens moord.
Pieter Crous, eienaar van Flamingo’s, het gister gesê lede van die Tshwane-metropolisie wag sy kliënte in die oggendure in, waarna hulle opgelaai en na kitsbanke geneem word.
“Die kliënte moet dan geld trek en aan die metropolisielede gee, of hulle word weens dronkbestuur in hegtenis geneem.”
Crous het bevestig Roux en ’n vriend was Vrydagoggend in sy klub. ’n Persoon wat ook in Flamingo’s was, het gesê Roux en sy vriend het kort voor middernag “reeds dronk” daar aangekom. Roux het die klub ná 01:00 verlaat.
Roux het Maandag in die Pretoriase landdroshof verskyn op aanklagte van moord op sers. Ntshimane Johannes Mohale (38) en weens dronkbestuur. Hy is op borgtog van R100 000 vrygelaat.
Rudi Krause, sy regsverteenwoordiger, het in die borgtogaansoek gesê Roux was ’n “slagoffer van diefstal deur ’n metropolisiebeampte”.
Die Tshwane-metropolisie het ’n interne ondersoek begin na Mohale en sy twee kollegas wat Roux afgetrek het. Dié ondersoek sal die vierde interne klag wees wat teen Mohale ondersoek word.
Console Tleane, woordvoerder van die Tshwane-munisipaliteit se departement van gemeenskapsveiligheid, wou nie een van die klagtes bevestig nie. Hy het wel gesê die interne ondersoek wat die metropolisie na Mohale se moord doen, is “standaard- prosedure”.
“Ons werk saam met die polisie om die saak te verstaan.” Hulle kyk onder meer na die proses wat gevolg is nadat Roux weens dronkbestuur afgetrek is.
Roux is nie in hegtenis geneem of geboei nie. Mohale het agter die stuurwiel van Roux se motor ingeklim en met hom rondgery.
Waar hulle oral rondgery het, kon teen druktyd nie bevestig word nie. Hulle het wel weg van die naaste polisiekantore in Sunnyside en Brooklyn gery.
Dikeledi Lehobye, burgemeesterskomiteelid vir gemeenskapsveiligheid in Tshwane, het die middag ná Mohale se dood gesê die metropolisielede was op pad om Roux na sy huis te neem toe die voorval plaasgevind het.
Drie ander interne ondersoeke is al gedoen waarby sers. Johannes Mohale betrokke was, het Die Burger by vier onafhanklike betroubare bronne verneem. Die ondersoeke was na:
* Diefstal en wanordelike optrede in Julie 2007;
* Pligsversuim en onprofessionele gedrag in November 2008; en
* Growwe nalatigheid, die pleging van ’n daad wat skadelik vir die raad is en pligsversuim in Desember 2008.
Nie een van dié ondersoeke of tugverhore is afgehandel nie.
Volg Nuus24 op Twitter.