Blou Bul-bylmoordenaar 'is skisofrenies'

2012-11-26 09:06

Johannesburg – Die verhoor van ‘n voormalige Blou Bul-rugbyspeler wat van ‘n reeks bylmoorde aangekla word, sal binnekort in Durban se hooggeregshof voortduur.

Die verhoor is verlede week uitgestel toe Phindile Joseph Ntshongwana se prokureur, Themba Mjoli, gesê het sy kliënt lyk gespanne.

Mjoli sê dis ‘n simptoom van die beskuldigde se siektes; ‘n bipolêre toestand en skisofrenie.

‘n Vrou wat twee jaar gelede na bewering deur die oud-rugbyspeler verkrag is, het verlede week haar plek in die getuiebank geneem.

Sy het gesê Ntshongwana het haar sonder ‘n kondoom verkrag in die drie dae wat hy haar aangehou het. Hy het blykbaar gedink sy is sy vriendin.

Die vrou sê hulle het nog nooit vantevore ontmoet nie.

“Hy het my gevra hoekom ek sy kind vermoor het,” het die vrou gesê.

Ntshongwana staan tereg op aanklagte van ontvoering, verkragting en aanranding.

Die oud-rugbyspeler staan ook tereg op drie aanklagte van moord en twee aanklagte van poging tot moord.

Ntshongwana het na bewering Paulos Hlongwa, Simon Ngidi en nog ‘n man vermoor. Hulle is almal met ‘n byl doodgekap.

Hy het op al die aanklagte teen hom onskuldig gepleit.

Volg Nuus24 op Twitter

- SAPA