Bloem-paartjie gesoek ná selfmoordpakt
2013-02-12 09:22
Bloemfontein – 'n Grootskaalse soektog is aan die gang na 'n paartjie van Bloemfontein wat na bewering ’n selfmoordpakt aangegaan het, berig Volksblad.
Mariske Groenewald (26) en Liza Hugo (32) is albei Saterdagaand by die Parkweg-polisiekantoor deur hul families as vermis aangemeld.
Volgens Liza se pa, Duart Hugo, het sy ’n selfmoordbrief agtergelaat waarin sy sê sy het begin dwelms gebruik en is skaam om terug te kom.
Duart sê daar is egter niks wat sy en sy vrou, Tolla, se liefde vir hul dogter kan minder maak nie.
“Ons sal haar soos altyd oorweldig met liefde.”
Die selfmoordbrief is Saterdagaand in haar Bybel gekry.
“Sy het in die brief gesê dat sy ’n einde aan alles wil maak.”
Liza het tot ’n stukkie aan almal geskryf wat baie vir haar in haar lewe beteken en wie haar draers op haar begrafnis moet wees.
Hoewel hy nog nooit vir Mariske ontmoet het nie, het hy by haar vriende verneem sy dogter en Mariske is in ’n verhouding en hulle is Saterdag saam in Liza se wit Chery QQ gesien.
Mariske het volgens haar stiefbroer, Mark Matthysen, Saterdag kort voor 22:00 ’n laaste SMS aan hulle gestuur dat sy “klaar is met alles”.
Sy is in Januarie vanjaar van haar man geskei en het twee klein kindertjies.
Die vroue se families het mekaar die eerste keer by die Parkweg-polisiekantoor ontmoet waar hulle die twee jong vroue as vermis aangemeld het.
Die registrasienommer van die wit Chery QQ is DZC124FS.
Enigiemand met inligting word gevra om ao. Herman Coetzee by 083 454 9299 te bel.
– Volg Nuus24 op Twitter
