Bloem-lughawe gons oor Zuma-besoek

2012-12-13 10:16

Bloemfontein – Die Rosestad se lughawe is in rep en roer in afwagting vir pres. Jacob Zuma se besoek.

OFM berig die president gaan binnekort die lughawe se nuwe naam, Bram Fischer- internasionale lughawe, amptelik inhuldig.

Zuma sal na verwagting omstreeks 10:00 by die Tempe-lugmagbasis land en daarna na die lughawe vir die inhuldiging geneem word.

Die president sal deur die minister van vervoer (Ben Martins), die premier van die Vrystaat (Ace Magashule) en die uitvoerende burgemeester van Mangaung, Thabo Manyoni, vergesel word.

Hy gaan ook later die middag 'n standbeeld van oudpres. Nelson Mandela op Naval Hill onthul.

Die ANC se verkiesingskongres word ook die naweek in die stad gehou. Die konferensie sal by die Universiteit van die Vrystaat se Bloemfontein-kampus afskop.

Sapa berig tussen 50 000 en 200 000 besoekers word in die stad verwag.

Volg Nuus24 op Twitter