Block: Ondersoeker beweer inmenging
2010-11-12 09:06
Volksblad
Kimberley - ’n Opspraakwekkende verklaring het die omvang onthul van beweerde korrupsie en inmenging uit die hoogste vlakke by die amptelike ondersoek na die maatskappy van die omstrede provinsiale ANC-leier, John Block, en die departement van gesondheid.
Die verklaring wat dié week hier by die landdroshof ingedien is, het deel gevorm van die staat se betoog om borgtog teen te staan vir Block, ook LUR van ekonomiese sake in die provinsie, en die miljoenêr-sakeman van Uruguay, Gaston Savoi.
Die verklaring deur ’n ondersoekbeampte van die gesondheidsdepartement het onthul dat dit nie net die beweerde korrupte verkoop van toerusting is wat ondersoek word nie, maar ook die wederregtelike verskaffing van hospitaal-suurstof.
Block en Savoi is mede-direkteure in die maatskappy Intaka Northern Cape en staan saam met nog agt mense tereg op 15 aanklagte van bedrog, korrupsie, geldwassery en oortredings van die Openbare Finansiële-Bestuurswet.
Luidens die klagstaat het Block glo R772 000 van Savoi en sy maatskappy Intaka Holdings gekry in ruil daarvoor dat hy sy invloed sou gebruik om tenders vir die verskaffing van watersuiweringsaanlegte deur Intaka Investments toegestaan te kry.
Die staat het albei aangeklaagdes se borgtogaansoek teengestaan; Block s’n op grond van argumente dat hy in ’n magsposisie dien, met wye magte om die stelsel te manipuleer en getuies te beïnvloed.
As bewys hiervan het die staat die beëdigde verklaring van Daniel Snyman, saam met ’n verklaring deur die ondersoekbeampte in die Intaka-saak, by die borgtogverhoor ingelewer. Snyman is ’n ondersoekbeampte van die Medisyne-beheerraad (MBR) in Pretoria se inspektoraat en wetstoepassingseenheid.
Snyman beskryf hoe hy in 2007 ingeroep is deur “dr. J Gouws, en meegedeel is dat ek en sy gedreig is deur die registrateur en DG met afdanking as dit nie op skrif gestel word dat die sake wat geopen is in verband met die ‘Intaka Suurstof’-saak, onmiddellik teruggetrek word nie”.
Die hofdokumente verduidelik nie verder wie dr. J, Gouws of die DG is nie, maar in 2007 was ’n dr. Joey Gouws ’n direkteur van die inspektoraat en wetstoepassing by die nasionale gesondheidsdepartement se medisynebeheerliggaam.
Die direkteur-generaal van gesondheid in daardie stadium was die omstrede Thami Mseleku, wat verlede jaar deur die nuwe minister van gesondheid, dr. Aaron Motsoaledi, afgedank is.
Die ondersoek na Intaka het nie net gehandel oor meer as R113 miljoen se aankope wat glo sonder behoorlike tenders aangegaan is nie, maar ook oor die vervaardiging, gebruik en verkoop van ongeregistreerde suurstof by hospitale.
Die suurstof wat by hospitale aangebring en onwettig gebruik is, was nie geregistreer soos die wet vereis nie. Snyman sê hulle het eindelik nie verder ondersoek nie, al het hy gewaarsku dit sou op regsverydeling uitloop. Hy het egter aangehou om inligting te versamel.
- Volksblad