'Blade moet skuld dra vir stormloop'
2012-01-11 08:01
Johannesburg – Dr. Blade Nzimande, minister van hoër onderwys en opleiding, moet die skuld dra vir die treurspel waarin ’n vrou Dinsdag in ’n stormloop by die Universiteit van Johannesburg (UJ) dood is.
Dr. Junita Kloppers-Lourens, DA-woordvoerder oor hoër onderwys, het gesê Nzimande het verlede jaar na die ellelange toue by universiteite as ’n “wonderlike probleem” verwys.
“Die ‘wonderlike probleem’ het nou ’n treurspel geword.
“Hy het verlede jaar nie ’n plan vir die probleem gehad nie en het sedertdien niks daaraan gedoen nie.”
Dr. Ihron Rensburg, rektor van die UJ, het gesê ná verlede jaar se toestroming van studente het die universiteit ’n jaar lank gewerk om dit nou te hanteer. Tog het dinge verkeerd geloop.
Die stormloop by die Universiteit van Johannesburg het Dinsdag omstreeks 08:00 begin toe die hekke in Buntingweg oopgemaak is vir ’n skare van sowat 6000 wat buite beheer daarteen gedruk het.
Benewens die vrou van 46 wat dood is, is 16 mense beseer.
Sowat 15 000 studente probeer plek by die UJ kry, terwyl daar net vir 800 plek is.
Oor die land heen was daar by universiteite en ander instellings lang toue van matrikulante wat plek probeer kry het.
Nzimande het Dinsdag op ’n nuuskonferensie maatreëls aangekondig om soortgelyke voorvalle in die toekoms te verhoed.
Sy departement wil vanjaar nog ’n sentrale aansoeke-en-registrasiestelsel in werking stel. Die departement oorweeg dit ook om nie meer “instap-aansoeke” aan die begin van die jaar toe te laat nie.
Nzimande het die probleem van lang rye by universiteite en instellings toegeskryf aan studente wat hulle laat inskryf omdat hulle nie op grond van hul gr.11-punte vroeër toelating gekry het nie, of in die matriekeksamen beter gevaar het en nou wil studeer.
Daar is net sowat 180 000 plekke by die 23 universiteite, terwyl 346 000 van 2011 se matrieks toelating tot graad-, diploma- en sertifikaatstudie gekry het.
Nzimande wil baie meer doen om die 7 000 hoërskole oor die land heen te bereik om skoolverlaters oor naskoolse geleenthede in te lig.
Hy het gesê daar is 50 000 plekke vir studente by kolleges vir verdere onderwys en opleiding.
Volgens hom is baie geld en hulpbronne daarin belê om die opleiding te verbeter. Boonop is tot R1,2 miljard se beurse vir voornemende kollege-studente beskikbaar.
Hy het ook na die planne vir twee nuwe universiteite in Mpumalanga en die Noord-Kaap verwys waaroor pres. Jacob Zuma in sy staatsrede sal uitwei.
– Alet Rademeyer, Janice Keogh en Jani Meyer
- Volksblad