Biskop in sop oor seks
2010-04-15 12:14
Durban – ‘n Biskop van die National Christian Assemblies of God het in die Harding-landdroshof verskyn nadat ‘n hele string aanklagte van seksuele teistering teen hom aanhangig gemaak is.
Sandile Christopher Ndlovu, word daarvan beskuldig dat hy die vroulike lidmate van sy kerk glo seksueel geteister het.
Volgens die Isolezwe-koerant was sommige van die vroue getroud en was daar selfs ‘n 14-jarige slagoffer.
Die pa van die 14-jarige meisie het Woensdag in die hof getuig. Volgens hom was sy dogter na bewering deur Ndlovu geteister terwyl hy aan die kerk verbonde was.
Na bewering het ‘n groep van die kerk se leiers saamgekom en vir Ndlovu gevra om twee lyste op te stel van al sy slagoffers. “Die een lys is vir die jong slagoffers en die ander lys vir die ouer slagoffers,” het die getuie gesê.
Ndlovu het glo ooreengekom om sowat R300 000 aan die kerk te gee sodat hulle dit aan die slagoffers kan oorhandig.
Volgens die getuie het Ndlovu ‘n ooreenkoms onderteken om dié bedrag geld voor 25 Junie 2007 te betaal.
Ndlovu het glo nooit die geld betaal nie.
Die saak duur Donderdag voort.
- Sapa