Biskop deur kerk aangekla
2010-01-22 14:09
Johannesburg – Biskop Paul Verryn van die Sentrale Metodistekerk in Johannesburg sal op 1 Februarie voor ‘n dissiplinêre komitee verskyn.
"Hy is aangekla daarvan dat hy die kerkreëls oortree het, veral dié van die Metodistekerk van Suid-Afrika,” het die kerk Vrydag in ‘n verklaring gesê.
Bongani Khoza, van die regsfirma wat namens die kerk optree, wou nie die redes van Verryn se skoring was nie. Hy is glo Dinsdag geskors maar die kerk het dit eers Donderdag bekendgemaak.
Verryn was verlede jaar in die spervuur weens kritiek oor die situasie by sy kerk waar talle Zimbabwiese vlugtelinge skuiling gevind het.
Ook die Gautengse regering het kommer uitgespreek oor die haglike omstandighede waarin die vlugtelinge woon.
Die Suid-Afrikaanse Raad van Kerke (SARK) het egter Verryn se kant gekies en gesê hy het bloot gereageer op die nood van mense waarop die regering nié ag geslaan het nie. Volgens die SARK was Verryn nie die “skurk” in die verhaal nie, maar dat dit die regering van Zimbabwe, asook die Suid-Afrikaanse regering was.
- Sapa