‘Bid vir Zuma, help vir Zuma’

2010-03-08 07:36

Neels Jackson

Johannesburg - As pres. Jacob Zuma eergister se Draai terug na God-saamtrek bygewoon het, sou Angus Buchan hom bemoedig en vir hom koers aangedui het, maar hom nie veroordeel het nie.

Buchan, die Greytownse evangelis, was een van die hoofsprekers op die saamtrek wat in die tuine skuins onder Zuma se kantoor in die Unie­gebou gehou is.

Vroeër, toe die organiseerders nog gehoop het dat Zuma die saamtrek sou bywoon, het Buchan daarna uitgesien om van die verhoog af met Zuma in Zoeloe te praat.

Met die president wat nie daar was nie, het Buchan eergisteroggend by navraag vertel wat hy aan Zuma sou sê.

Die eerste ding wat die president sou hoor, is: “Ons bid vir u.”

Buchan het gesê Zuma is die president. Kom wat wil. Hy sal vir hom bid soos die Bybel sê.

Daarna sou hy aan Zuma sê as hy sy oog op God gerig hou, sal die Here hom nie versaak nie.

As hy die Bybel as ’n handboek gebruik, sal hy nie struikel of foute maak nie.

“Hy moet weet daar is meer mense in Suid-Afrika wat vir hom bid as wat hy besef,” het Buchan gesê.

Voorts sou hy aan Zuma sê hy moet vorentoe gaan en nie terugkyk nie. “As ’n boer, want hy het op ’n plaas grootgeword, weet hy dat as hy reguit wil ploeg, hy nie kan omkyk nie,” het Buchan gesê.

Hy sou ook aan die president sê dat kompromisse nie ’n opsie is nie. Die Christene van die nasie, en hulle is die meerderheid, wil die waarheid hê.

“In die vertroue dat God hom sal lei om die land volgens Christelike etiek te regeer, is ek persoonlik baie optimisties oor die toekoms van die nasie.

“Maar jong mense wil graag sterk Christelike leierskap sien.” Dit is volgens Buchan ál wat hy aan Zuma sou sê.

Op ’n vraag of hy nie regstreeks na kwessies soos Zuma se poligamie sou verwys nie, was die antwoord: “Nee.”

Maar vra ’n mens hom of hy dink dat Zuma tog die boodskap sou kry, antwoord hy: “Ja.”

In sy preek het hy die skare aangemoedig om soos ’n Bybelse Josua te kies: “Ek en my huis sal die Here dien.”

Hy het hulle gemaan om op te hou vinger wys na die regering en gesê elkeen moet eers sy eie huis in orde kry.

“Ons wys vinger na die regering en die president, maar in ons eie huise is dit chaos,” het hy gesê.

Later toe hy jong mans aangemoedig het om op die regte pad te loop, het hy gesê hulle moenie kyk hoeveel meisies hulle kan swanger maak nie.

“Dis nie ’n man wat dit doen nie, dis ’n ‘wimp’,” het hy uitgeroep.

Hy het vertel dat hy ’n trotse man was, ’n selfgemaakte boer van Skotse agtergrond. “Meer arrogant as dít kry jy nie.”

Hy het vertel hoe hy tot inkeer gekom het en gesê as God hóm kon genees, kan hy enig- iemand genees. “Dan kan hy enigiemand daarbo verander.”

Aan die einde van sy toespraak het hy opgemerk: “Die president van Suid-Afrika is op soek na konstruktiewe steun. Moet hom nie kritiseer nie, help hom.”

Hy het bygevoeg daar is nie “maars” nie.

Die Bybel sê ’n mens moet mense in gesagsposisies re­spekteer.

- Beeld