Bid dat my hofaansoek slaag, vra adv. Barbie
2010-05-06 06:53
Kaapstad – Cézanne Visser het gister ’n gebedsversoek – dat haar aansoek om teen haar skuldigbevinding te mag appelleer, sal slaag – per e-pos uitgestuur.
Dit lui: “Bid asb vandag vir Regter Lex Mphati (sic), hoofregter v die Appelhof (sic), dat ons God hom sal lei om my saak aan die mees gepaste twee regters te oorhandig en dat die Heilige Gees absoluut hul gedagtes en harte sal lei sodat my verlof tot Appel (sic) toegestaan word. Amen. Cezanne.”
Mpati het appèlregters Mohammed Navsa en Belinda van Heerden gister aangewys om die finale besluit oor Visser – oftewel adv. Barbie – se aansoek te neem.
Hulle sal dit op kamerhof oorweeg.
Waarnemende regter Chris Eksteen het Visser vroeër in die hooggeregshof in Pretoria verlof tot appèl geweier.
Hy het haar vir sewe jaar tronk toe gestuur op 11 seksverwante aanklagte, wat onder meer kinderhuiskinders betrek.
Adv. André Fourie, leier van die staat se vervolgingspan, het verlede week gesê die staat gaan nie die aansoek formeel teëstaan nie.
Toe die lêer gister na die twee regters gegaan het, het die staat dit ook nie teëgestaan nie.
Die feit dat die staat geen beswaar teen Visser se aansoek ingedien het nie, beteken nie noodwendig die aansoek sal slaag nie.
Navsa en Van Heerden bestudeer die hooggeregshof se hofrekord in sy geheel saam met die aansoek.
Hulle sal op grond daarvan besluit watter weg om in die saak in te slaan.
Hulle kan die aansoek summier verwerp, of dit goedkeur en vir betoog op die hofrol laat plaas – op die vroegste einde vanjaar.
Andersins kan hulle beveel Visser en die staat moet ’n volbank regters van die appèlhof daaroor toespreek.
- Die Burger