Bheki Cele dalk geskors
2011-09-23 07:01
Kaapstad - Pres. Jacob Zuma het Donderdagaand ná maande se wik en weeg aangekondig hy oorweeg dit om genl. Bheki Cele, nasionale polisiehoof, te skors.
Hy gaan ook ingevolge die Polisiewet ’n raad van ondersoek belê na adv. Thuli Madonsela, openbare beskermer (OB), se bevindings dat Cele hom aan wanbestuur skuldig gemaak het.
Zuma het Cele op 29 Augustus reeds in kennis gestel dat hy dié raad gaan aanstel om die bevindings te ondersoek en ’n aanbeveling oor Cele se toekoms te maak.
Intussen is Cele gevra om in ’n voorlegging aan die president te motiveer hoekom hy nié hangende die uitslag van die ondersoek geskors moet word nie.
Luidens die verklaring wat Donderdagaand deur die presidensie uitgereik is, het Cele ’n “omvattende” voorlegging ingedien en is Zuma besig om te besluit of hy hom moet skors of nie.
Mac Maharaj, presidensiële woordvoerder, wou Donderdagaand nie uitwei oor wanneer Zuma beoog om die raad aan te wys en wie daarin sal dien nie.
“Die president moet eers besluit (oor Cele se moontlike skorsing). Hy werk daaraan selfs terwyl hy in New York is.
“Ons praat hier van die land se top-polisieman. Die regte prosedure moet gevolg word. Hopelik sal almal nou besef die president wou nog nooit van dié kwessie wegskram nie.”
Volgens Maharaj gee Zuma ook aandag aan die OB se bevindings teen Gwen Mahlangu-Nkabinde, minister van openbare werke. “Maar dit is ’n heeltemal ander proses en ander wetgewing is (op haar) van toepassing.”
Genl.maj. Nonkululeko Mbatha, Cele se woordvoerder, kon nie Donderdagaand vir kommentaar bereik word nie.
Ander polisiewoordvoerders was onbewus van dié ontwikkeling en wou nie daaroor kommentaar lewer nie.
Madonsela het op 14 Julie vir ’n tweede keer bevind Cele het onregmatig en onwettig opgetree en hom aan wanbestuur skuldig gemaak in verband met ’n huurooreenkoms van R1,17 miljard vir die polisie se provinsiale hoofkantoor in Durban.
In Februarie het sy soortgelyke bevindings oor hom gemaak oor ’n huurooreenkoms van R500 miljoen vir die polisie se nuwe hoofkantoor in Pretoria.
Madonsela het bevind albei huurooreenkomste met die sakeman Roux Shabangu is ongeldig en onwettig omdat die Wet op Openbare Finansiële Bestuur oortree is en dit strydig met tesourie-regulasies en tenderprosedures is.
Hoewel Cele nooit self die huurooreenkoms met Shabangu onderteken het nie, het hy ’n behoeftebepaling vir die nuwe provinsiale kantoor in Durban goedgekeur, asook ’n versoek vir meer geld omdat die polisie nie daarvoor begroot het nie.
Volg Nuus24 op Twitter.
- Die Burger