Betoging oor e-tolstelsel ruk hoofweë

2012-12-06 07:01

Johannesburg –  Cosatu sal Donderdagoggend die spitsverkeer op hoofweë in Ekurhuleni en Johannesburg teen 'n slakkepas aandurf uit protes teen die e-tolstelsel in Gauteng.

Dié twee betogings sal op sommige van Johannesburg se besigste hoofweë – die N1, M2, M1, N3, N12, R24, en die R21 – plaasvind. Sowat 100 motors word op elke roete verwag.

Die betoging sal om 08:00 begin.

Dumisani Dakile, provinsiale sekretaris van Cosatu in Gauteng, het 'n beroep gedoen op motoriste wat aan die betoging deelneem om hul hoof- en noodligte aan te skakel. Sommige van die motors sal ook baniere hê.

Cosatu het gesê hy het toestemming van die Johannesburg- sowel as die Ekurhuleni-metro ontvang om te betoog. Die vakverbond het egter nie toestemming gekry om in Pretoria te betoog nie.

– Volg Nuus24 op Twitter

- SAPA