Betogers brand raadslid se huis af
2010-02-24 10:57
Johannesburg - 'n Raadslid se huis en motor is deur ontstoke betogers in Sharpeville, Johannesburg, aan die brand gesteek.
Kapt. Julia Klaasen, 'n polisiewoordvoerder, het Woensdag gesê die voorval het omstreeks 23:00 Dinsdagaand plaasgevind.
Niemand is in verband met die voorval in hegtenis geneem nie en die betogers is intussen uiteengejaag.
Inwoners het Dinsdag begin betoog en het paaie in die gebied versper.
Hulle het bande aan die brand gesteek en Seifostraat en die Vuka-afdeling van die nedersetting versper.
'n Bus wat passasiers opgelaai het, is met klippe bestook terwyl dit deur die gebied gery het. Een passasier is beseer.
Sy is na 'n nabye hospitaal geneem vir behandeling.
Die polisie glo die oorsaak van die betoging is swak dienslewering in die gebied.
Klaasen het gesê die polisie sal Woensdag die gebied monitor.
Gemeenskapsleiers en inwoners het Dinsdag by die Sharpeville-stadion vergader om regeringsbeamptes "onder die toesig en beheer van die polisie" te ontmoet.
Intussen is Orange Farm kalm ná gewelddadige betogings die afgelope paar dae.
– Sapa