Bestuurder soek ná trekker man doodry
2011-11-05 18:05
Johannesburg – 'n Man is Saterdagmiddag dood ná 'n trekker oor hom gery het toe hy in Mid Illovo in KwaZulu-Natal van dié voertuig afgeval het, het paramedici gesê.
Die man, in sy vroeë 20's, het op Umbumbulu-straat, ongeveer 5 km van Mid Illovo se hoofstraat, saam met 'n bestuurder op die trekker gery, het Vanessa Jackson, woordvoerder vir ER24, gesê.
Die man het glo op die bakwerk bo die wiel gesit toe hy van die trekker afgeval het.
"Ooggetuies het verduidelik dat die trekker oor die man gery het ná hy afgeval het. Paramedici het hom gevind waar hy op 'n gruispad lê, in 'n kritieke toestand en skaars lewend."
Jackson sê paramedici het die man op die toneel vir ernstige beserings aan sy kop en bors behandel.
Hy is na die Edendale-hospitaal geneem vir verdere behandeling, maar sy toestand het kort na sy aankoms drasties versleg.
"Ten spyte van pogings deur die hospitaal se noodpersoneel, met bystand van paramedici, het die man nie sy beserings oorleef nie en is hy dood verklaar," het Jackson gesê.
Die polisie sal die saak ondersoek omdat die trekker en bestuurder nie op die toneel agtergebly het nie.
– Volg Nuus24 op Twitter.
- SAPA