Bestuurder met epilepsie was glo metro-beampte
2012-08-14 11:45
Johannesburg – Die motoris wat die lewe van ‘n baba geëis en ‘n ma en haar ander kinders beseer het toe hy ‘n epileptiese aanval in Soweto gehad het, is ‘n metropolisie-beampte, is Dinsdag berig.
Die ses maande oue Tshiamo Letsholo is op sy ma, Sylvia, se rug dood terwyl sy op pad was na die regeringsagentskap vir maatskaplike sekerheid (Sassa).
Haar seun, Oratile (5), wat glo doofstom is, haar dogter, Mmathapelo (17), en haar niggie Utlwanang is beseer.
Senock Matoboko, woordvoerder vir Johannesburg se nooddienste, het aan The Star gesê die beampte het glo verlede jaar met ‘n Volkswagen Golf teen ‘n muur op dieselfde pad gebots terwyl hy ‘n epileptiese aanval gehad het.
Volgens Edna Mamonyane, ‘n metropolisie-woordvoerder in Johannesburg, was die beampte op pad werk toe in sy eie motor toe die ongeluk Maandag in Meadowlands plaasgevind het.
“Ons kan op die oomblik nie bevestig wat veroorsaak het dat hy beheer oor die motor verloor het nie, maar daar word beweer dat hy ‘n epileptiese aanval gehad het,” het sy aan die koerant gesê.
“As hy ‘n toestand het, het hy dit nie aan ons bekendgemaak nie. Dit sal gevaarlik wees om iemand met epilepsie op die pad te sit, veral omdat ons nie weet hoe ernstig die toestand is nie.”
– Volg Nuus24 op Twitter
- SAPA
