Besluit oor Moodley kom nader
2011-08-22 07:02
Johannesburg - Die nasionale vervolgingsgesag (NVG) moet teen Woensdag aandui of hulle Donovan Moodley (31) se aansoek teenstaan om herverhoor te word weens die ontvoering en moord van Leigh Matthews sewe jaar gelede.
Moodley is destyds lewenslange tronkstraf opgelê. Matthews en Moodley was medestudente by Bond Universiteit in Sandton.
Adv. Zaais van Zyl, staatsadvokaat in die saak, het gister gesê die staat het nie op Moodley se oorspronklike aansoek, wat op 18 Julie vanjaar by die hooggeregshof in Johannesburg ingedien is, geantwoord nie omdat daardie dokumente nie in orde was nie.
“Daar was bladsye in sy oorspronklike aansoek wat nie leesbaar was nie of vermis was – gedeeltes wat die kern van sy ‘ware’ weergawe verduidelik,” het Van Zyl gesê.
Moodley het in die aansoek beweer hy is afgedreig om by Matthews se ontvoering betrokke te raak en moes toekyk hoe iemand anders haar doodskiet.
Moodley, wat skuldig gepleit het op die aanklag van moord, het reeds al sy appèlprosesse uitgeput.
In dié herverhoor-aansoek voer hy aan dat vermeende onreëlmatighede tydens sy verhoor hersien moet word.
Van Zyl was nie bereid om kommentaar op die meriete van die saak te lewer voor die staat se dokumente nie voor die hof is nie.
– Volg Nuus24 op Twitter
- Beeld