Beskermer moet besluit oor DA-tender
2011-08-21 21:55
Johannesburg – Die Openbare Beskermer, Thuli Madonsela, sal vandeesweek besluit of sy ‘n tender vir kommunikasiedienste in die Wes-Kaap sal ondersoek, het haar woordvoerder Sondag gesê.
Die tender, wat tussen R50 miljoen en R70 miljoen werd is en aan die agentskap TBWA/Hunt Lascaris toegeken is, is ‘n kontrak van twee jaar vir die ontwikkeling en implementering van ‘n handelsnaam- en kommunikasiestrategie vir die Wes-Kaapse regering.
Kgalalelo Masibi, Madonsela se woordvoerder, het gesê daar word op die oomblik vasgestel of ‘n ondersoek na die saak nodig is.
Die Sunday Times het berig die provinsiale tesourie in die Wes-Kaap het bevind daar was ‘n gebrek aan beheermaatreëls en goeie regeringsbeginsels in die toekenning van die tender.
Zille het aan die koerant gesê sy glo die tenderproses was “deursigtig, regverdig, billik, mededingend en koste-effektief”.
“Ek het gesê ons het niks om weg te steek nie en het die ouditeur-generaal versoek om ‘n oudit van die tenderproses uit te voer,” het sy gesê.
- Volg Nuus24 op Twitter
- SAPA