Besighede gewaarsku teen 'Saru'-swendelaar
2012-01-19 13:01
Johannesburg – Minstens twee restaurante in Kaapstad het deurgeloop onder ‘n man wat beweer hy is ‘n verteenwoordiger van die Suid-Afrikaanse Rugbyunie, het die organisasie Donderdag gesê.
“In een geval het ‘n restaurant in Kaapstad ‘n bespreking gekry vir ‘n ete vir 27 mense,” het Saru in ‘n verklaring gesê.
In ‘n ander voorval is ‘n bespreking vir 36 mense gemaak.
Die man, wat homself voorgedoen het as die voorsitter van die organiseringskomitee van Saru, het ‘n vals betalingsbewys gebruik om te beweer dat hy te veel betaal het vir ‘n ander bespreking.
“Die man vereis vergoeding wat in sy rekening inbetaal moet word om te verseker dat sy groep se vervoer betaal kan word om na die restaurant te gaan vir die bespreking.”
Besighede word gewaarsku om op hul hoede te wees vir ‘n man wat homself Craig Adams noem en die e-pos-adres theboks@therugby.co.za gebruik.
“Die persoon werk nie by Saru nie en gebruik ook nie die e-pos-adres nie. Saru ondersoek die saak en dit sal ook later na die polisie verwys word vir verdere ondersoek,” het die rugbyunie gesê.
– Volg Nuus24 op Twitter
- SAPA