Beseerde Marikana-mynwerkers 'wéér geskiet'
2012-12-20 16:00
Rustenburg – Stakende mynwerkers wat die skietery deur die polisie op 16 Augustus oorleef het, is "deursoek en toe wéér geskiet", het die Farlam-kommissie Donderdag gehoor.
Die mynwerkers se prokureur adv. Lesego Mmusi het gesê selfs die betogers wat hulself oorgegee het, is deur polisiebeamptes geskiet.
Dít het aan die lig gekom terwyl Mmusi vir brig. Zephania Mkwanazi, ’n opleidingsdeskundige in openbare orde-polisiëring, gekruisondervra het.
"Bewyse sal toon nadat die polisie vir agt sekondes skote afgevuur het, het hulle die betogers genader wat geskiet en op die grond gelê het," het hy gesê.
"Hulle het die betogers een vir een deursoek om te kyk of hulle dood is. Die wat nie dood was nie is wéér geskiet."
Mmusi het aan die afgetrede regter Ian Farlam gesê hy gaan getuies bring om sy bewerings te staaf.
Die Marikana-kommissie van ondersoek het vroeër gehoor dat Susan Shabangu, minister van minerale hulpbronne, die polisie beveel het om stakende mynwerkers tydens die Lonmin-staking te skiet.
Dít het aan die lig gekom terwyl Mkwanazi deur adv. George Bizos ondervra is.
Mkhwanazi het egter gesê die polisie se doel is om polisiebeamptes te leer om gemeenskappe te beskerm en nie dood te skiet nie.
Hy hou vol dat hy nie deel was van die polisie-ingryping op 16 Augustus nie en het herhaaldelik geweier om verskeie vrae van Bizos te beantwoord.
Mkhwanazi het gesê hy wil nie aannames maak nie, maar het saam met Bizos gestem oor die stelling dat Shabangu se uitlating polisiebeamptes kon verwar.
Volgens Bizos het die minister gesê sy soek nie 'n waarskuwingskoot nie en dat die polisie in Marikana nie bekommerd hoef te wees oor regulasies nie.
Mkwanazi het gesê hy is nie bewus van dié stelling nie en hou vol dat "dood" en "skiet" nie in sy woordeskat is nie.
Die kommissie se verhoor sal weer op 21 Januarie hervat word.
- SAPA
