Berigte oor hospitale se vuil linne 'onwaar'
2012-09-12 12:40
Durban – Sibongiseni Dhlomo, LUR vir gesondheid in KwaZulu-Natal, ontken berigte dat provinsiale hospitale ‘n tekort aan linne het, het ‘n koerant berig.
The Mercury het vroeër berig dat alle provinsiale hospitale sukkel om skoon linne vir operasiesale in die hande te kry, aangesien die provinsiale departement van gesondheid se grootste wassery – by Sea Cow Lake in Durban – se wasmasjiene nie werk nie.
Volgens die koerant het dokters by Addington-hospitaal in Durban gedreig om operasiesale te sluit indien die departement van gesondheid nie werk daarvan maak om skoon linne te verskaf nie.
Dhlomo het glo in ‘n onderhoud aan Ukhozi FM gesê dié hospitaal is die enigste een wat ‘n krisis beleef.
“... Dis net Addington-hospitaal wat deur die probleem in die gesig gestaar word, omdat sy bestuur óf lui is óf nie weet hoe om sy werk te doen nie,” het sy gesê.
Dhlomo sê die hospitaal moet verduidelik hoekom hy met beddegoed sukkel en hoekom ander hospitale wie se wasgoed by dieselfde wassery gewas word, nie dieselfde probleem het nie.
Empangeni se Ngwelezana-hospitaal het ook probleme met linne aangemeld.
The Mercury berig die wassery, wat 12 hospitale en nege klinieke se linne was, het drie tonnelwasmasjiene, maar net een van hulle werk. Vyf ander kleiner masjiene, is ook foutief.
Volg Nuus24 op Twitter
- SAPA
