Benoni-betoging raak gewelddadig
2012-10-17 14:11
Johannesburg – 'n Diensleweringsbetoging buite Benoni se munisipale geboue het Woensdag gewelddadig geraak.
Betogers het stokke en klippe na polisiebeamptes gegooi wat gehelp het om die gebou af te sper.
Die polisie het rubberkoeëls gebruik om die betogers te verjaag.
Ongeveer 20 mense is in die chaos beseer. Sommige het beserings opgedoen toe hulle geval het terwyl mense probeer vlug het.
'n Paar van die betogers is in hegtenis geneem en in polisievoertuie van die toneel weggeneem, en die skare is daarna uitmekaar.
Honderde betogers wat terug na 'n informele nedersetting in die buitewyke van Wattville geloop het, het motors en winkels beskadig.
"Ek kan nie glo hulle het dit gedoen nie," het een motoris gesê, wat uit 'n winkel gekom het en ontdek het dat sy motorruit uitgeslaan is.
'n Sapa-verslaggewer op die toneel het minstens vyf erg beskadigde motors getel.
'n Man wat as die protesleier geïdentifiseer is, Ezekial Mtungwa, het agter die groep geloop.
"Ek is teleurgesteld in hulle. Dis nie wat ons beplan het nie," het hy gesê.
"Ek het vir die polisie gesê hulle moet oorneem."
Mtungwa was deel van 'n groep wat met amptenare van die behuisingsdepartement wou praat oor hulle griewe.
"Ons het antwoorde gesoek... Mense wag al lank vir huise, maar intussen verdwyn daar geld en niks word gedoen nie," het hy bygevoeg.
– Was jy op die toneel? Stuur jou foto's aan ons.
– Volg Nuus24 op Twitter.
