Benoemings vir ANC-topses gou bekend
2012-12-14 14:54
Bloemfontein – Die ANC sal Sondag die name bekendmaak van lede wat die benoeming vir die party se topses-posisies aanvaar het, het Jackson Mthembu, woordvoerder van die party, gesê.
Die ANC se 53ste nasionale kongres word vanaf Sondag tot Vrydag in Mangaung in die Vrystaat gehou.
Mthembu het gesê ANC-afgevaardigdes sal tydens Sondagaand se benoemings kandidate kan benoem wie se name nie reeds op die lys verskyn nie. Altesaam 25% van die konferensie moet egter dié benoeming ondersteun.
Pres. Jacob Zuma en adj.pres. Kgalema Motlanthe is albei vir die regerende party se toppos benoem.
Thabo Masebe, Motlanthe se woordvoerder, het gesê Motlanthe het die benoeming vir drie posisies – president, adjunkpresident en lid van die nasionale uitvoerende komitee – aanvaar.
Ander kandidate wat vir die pos van adjunkpresident benoem is, is die sakeman Cyril Ramaphosa, ANC-tesourier-generaal, Mathews Phosa en Tokyo Sexwale, minister van menslike nedersettings.
Benoemings vir sekretaris-generaal, adjunk-sekretaris-generaal, voorsitter en tesourier-generaal sal ook Sondag bekend gemaak word.
Die konferensie word op die kampus van die Universiteit van die Vrystaat in Bloemfontein gehou en sal afskop met 'n politieke verslag deur Zuma en 'n organisasieverslag deur die sekretaris-generaal, Gwede Mantashe.
– Volg Nuus24 op Twitter
- SAPA
