Bende steek tiener aan die brand

2012-11-19 13:21

Kaapstad – ‘n Tienerseun het die naweek gesterf toe hy in ‘n informele nedersetting aangerand en aan die brand gesteek is.

Cape Times berig ‘n bende het Sakhumzi Mawu (18) Saterdag om 17:00 uit sy huis in Samora Machel, Kaapstad, getrek.

Na bewering het inwoners op gesteelde goedere in sy kamer afgekom.

Sy tante, Thembakazi Ngombane, het aan die koerant gesê sy het hulpeloos gevoel toe die bende hom aangeval het.

“Ek kon sien sy liggaam was reeds swak toe hulle hom verder in die straat geneem en ‘n brandende buiteband om sy nek gesit het,” het sy gesê.

“Ek kon hom hoor huil en skree... maar daar was niks wat ek daaraan kon doen nie.”

André Traut, ‘n polisiewoordvoerder, sê niemand is tot dusver in hegtenis geneem nie.

“Ons sal dit nie duld wanneer die publiek die reg in hul eie hande neem nie... ons sal hulle soos algemene misdadigers behandel,” het hy gesê.

Volg Nuus24 op Twitter

- SAPA