SABC 'mag nie oor Malema berig'
2012-09-13 22:12
Johannesburg – ‘n SABC-vakbond sê sy lede is opdrag gegee om nié verslag te doen oor die geskorste leier van die ANC-jeugliga, Julius Malema, nie.
“Verskeie van ons lede het by ons kom rapporteer dat hulle opdrag gegee is om geen stories oor die geskorste leier van die ANC-jeugliga, Julius Malema, te doen nie,” het Bemawu, die grootste mediavakbond by die SABC, Donderdag gesê.
“Volgens die opdrag mag daar nie oor Malema verslag gelewer word nie, selfs al word hy vermoor of sterf hy op 'n ander manier, voordat die topbestuur nie toestemming gee nie.”
Kaizer Kganyago, die SABC se woordvoerder, het egter gesê die bewerings is onwaar.
“Dit is onwaar dat die SABC se nuusafdeling opdrag gegee het om Julius Malema te verban. Wat die bestuur voor gevra het is meer verantwoordelike verslaggewing,” het Kganyago gesê.”
Jimi Matthews, waarnemende nuushoof van die SABC, het in ‘n verklaring gesê dat hy sy nuusspan gevra het om meer konteks in hulle stories te verskaf.
“Ek is baie teleurgesteld met hoe sake verloop het. Pleks daarvan dat ons daaroor gesprek voer, het sekere lede van die personeel na ander media-instansies gehardloop en beweer dat ek Malema van die lug verban het,” het Matthews gesê.
“Niks kan verder van die waarheid af wees nie. Ek het gevra vir verantwoordelike joernalistiek en intellektuele betrokkenheid.”
Bemawu hou egter vol dat joernaliste by die SABC gewaarsku is om nie oor Malema te berig nie. Nuusredakteurs is glo vroeër van die opdrag in kennis gestel.
“Bemawu beskou dit as 'n growwe skending van die beginsels van joernalistiek en ook 'n aanval op die vryheid van die media,” het die unie in ‘n verklaring gesê.
“As ‘n openbare uitsaaier is dit die SABC se verantwoordelikheid om op ‘n regverdige, onbevooroordeelde en akkurate wyse verslag te doen.”
Bemawu het sy lede aangeraai om nie aan dié beweerde opdrag gehoor te gee nie.
“As die bestuur enige van ons lede wil aanvat omdat hulle die opdrag geïgnoreer het sal Bemawu sy lede verdedig en die saak tot op die hoogste vlak neem.”
– Volg Nuus24 op Twitter
- SAPA
