Beloofde kontrakte in die weermag ’n klug
2010-06-30 08:25
46 Diensvrywilligers in die Militêre Polisie (MP) meen hulle is onregverdig aan ’n lyntjie gehou deurdat hulle langtermynkontrakte belowe is, maar dit nie gekry het nie.
Hul tweejaarkontrakte as diensvrywilligers verval vandag.
Al 46 sit nou werk- en kontrakloos.
Hulle beweer hulle is vroeër ingelig dat hulle almal vir die verlenging van hul kontrakte in die MP in aanmerking sal kom.
Toe van hulle bekommerd was dat daar dalk nie werk vir die hele groep gaan wees nie, het hulle gevra of hulle om poste in een van die weermag se ander korpse aansoek moet doen.
Hulle beweer daar is gesê dit is nie nodig nie omdat meer as genoeg poste in die MP beskikbaar was.
Middel vandeesmaand is hulle egter ingelig dat vyfjaarkontrakte aan net ses lede van ’n groep van 52 aangebied gaan word.
Daar is gesê hulle kan by die Reserwemag aansluit om deeltyds diens te doen, anders moet hulle huis toe gaan.
Hulle beweer voorts die ses wat wel kontrakte gekry het, het almal ouers of familielede in hoë poste wat hulle bevoordeel het.
Drie sal in die MP se noordelike divisie aangewend word en die ander drie in die suidelike divisie.
Die groep beweer egter die divisies weet nie eens die ses het al kontrakte bekom nie.
Hulle beweer die situasie is ’n geval van baantjies vir boeties en dat die kontrakte wat voor hul neuse gehou is van die begin af ’n klug was.
Siphiwe Dlamini, hoofwoordvoerder van die weermag, het gesê alle diensvrywilligers wat by die weermag aansluit, weet hulle sluit net vir twee jaar aan.
In dié tyd word hulle opgelei terwyl loopbaanbeplanners hul vordering dophou.
“Daar is ’n beperkte aantal poste in die MP. Die kandidate is ingelig wie se kontrakte hernieu word.”
Volgens hom staan dit vrywilligers vry om aansoek te doen om poste in ander korpse.
- Volg Nuus24 op Twitter.
- Beeld