Beleid van geen genade geld van nou af op alle Wes-Kaapse paaie
2011-06-17 12:34
Philda Essop
Kaapstad - Spoedvrate en roekelose en nalatige bestuurders op die Wes-Kaap se paaie moet van vandag af geen genade van wetstoepassers verwag nie.
Dié waarskuwing is in die provinsiale parlement deur adv. Lennit Max, Wes-Kaapse minister van gemeenskapsveiligheid, aan motoriste gerig.
Die Kom Veilig Daar-veldtog, wat daarop gemik is om die getal sterftes en beserings op provinsiale paaie in die feestyd te verminder, begin vandag en duur tot 20 Januarie.
Ongemerkte voertuie en ’n spoedkamera met nagvisie sal onder meer ingespan word.
Die wetstoepassers gaan hulle veral op die N1 en die pad tussen Aberdeen en Beaufort-Wes toespits.
Daar sal padblokkades op die N1 naby Drie Susters en by die Aberdeen-satellietkantoor wees waar mense verplig sal wees om te stop en te rus.
Volgens Max is ’n voertuigskut by Beaufort-Wes ten volle operasioneel.
Openbare voertuie wat onpadwaardig en sonder die vereiste dokumente is, sal geskut word.
Wanneer dit by roekelose en nalatige bestuur kom, sal ’n beleid van geen genade op alle roetes in die provinsie geld.
“Ses ongemerkte voertuie is op die N1 tussen Worcester en Drie Susters ontplooi, sowel as op die Aberdeen-pad. Beamptes in dié voertuie sal alle motoriste monitor.”
Volgens Max sal wetgewing met betrekking tot spoed deurentyd in die feestyd toegepas word.
“Die direkteur van verkeerswetstoepassing het onlangs ’n Digicam-spoedmetingskamera met nagvisie aangeskaf. Die toestel is reeds met groot sukses in die nag getoets,” het hy gesê.
“As deel van die strategie vir vanjaar se feestyd gaan dié spoedkamera saam met ander spoedtoerusting gebruik word om te keer dat padgebruikers op die N1 en die Aberdeen-pad teen hoë snelhede jaag.” Al dié maatreëls sal ook in ander dele van die provinsie van toepassing wees.
Daar gaan ook spesiaal gefokus word op mense wat onder die invloed van alkohol of dwelms bestuur, asook mense wat onwettige middels vervoer, het Max gesê.
- Die Burger