Beleid oor straatname aangepas
2012-04-11 09:04
Johannesburg – Enkele weke voordat ’n lang lys nuwe straatname vir Pretoria goedgekeur is, het die ANC-beheerde Tshwane-metroraad sy beleid, wat behels dat inwoners ter wille van demokrasie in naamsveranderings geken moet word, gewysig.
’n Raadsdokument oor die straatname wat in September 2007 deur Tshwane se plek-en-straatnaamkomitee en die raad goedgekeur is, wys die metro het aansienlik afgewyk van wat destyds onderneem is.
Daar is in die dokument aanbeveel dat Tshwane se openbare plek-en-straatnaambeleid gevolg word “sodat ’n deursigtige besluit geneem kan word”.
Een van die vereistes in die beleid was dat minstens 51% van geregistreerde kiesers in ’n straat ’n nuwe naam daarvoor ter wille van demokrasie skriftelik moet goedkeur.
Tshwane het dié vereiste in Januarie gewysig.
Kgosientso Ramokgopa, Tshwane se uitvoerende burgemeester, het skaars twee maande later in sy stadsrede bekend gemaak nuwe name vir 25 strate is goedgekeur.
Daar is in die 2007-dokument onderneem dat die nuwe name in die plaaslike media aan inwoners voorgelê sou word. Daar was geen openbare deelname nie.
Janho Engelbrecht, die DA se hoofsweep in die raad, het gesê die DA wou nie op verlede maand se raadsvergadering teen die nuwe name stem nie omdat hy nie wil lyk soos ’n party wat aan die verlede vasklou nie.
Ramokgopa se kantoor het intussen Dinsdag aangedui die burgemeester het AfriForum se versoek oor die straatname aan die munisipaliteit se regsafdeling gestuur.
AfriForum het Ramokgopa verlede week in ’n prokureursbrief daarop gewys dat hy “regsprosedure” minag met sy besluit om die straatname in die hoofstad te verander.
Dié besluit is in ’n “blatante verbreking” van wat die munisipaliteit in 2008 onder eed in die hooggeregshof in Pretoria onderneem het, voer AfriForum aan.
Tshwane het in 2008, toe AfriForum die hof weens die beplande straatnaamveranderings genader het, onderneem dat verdere openbare konsultasie sou plaasvind.
AfriForum het toe besluit om die aansoek te onttrek.
Dié burgerregte-waghond dreig nou opnuut met regstappe tensy Tshwane voor Maandag bevestig hy skuif die uitvoering van die straatnaambesluit op die lange baan hangende ’n nuwe hofaansoek.
Pieter de Necker, Ramokgopa se woordvoerder, het gesê Tshwane se regsafdeling oorweeg die brief en dis ook aan Jason Ngobeni, munisipale bestuurder, gestuur.
“Die burgemeester se deur was nog altyd oop en almal is welkom om die kwessie met hom te bespreek, eerder as om hof toe te gaan.”
Volg Nuus24 op Twitter
- Beeld
