Belastingbetalers dok dalk op vir skade
2011-08-18 08:04
Kaapstad – Vakbondleiers spring nou rond om almal behalwe hulself te blameer vir die gewelddadige optrede van die stakende munisipale werkers, asook die gepaardgaande skade van derduisende rande wat vandeesweek in die Moederstad aangerig is.
Dit lyk al hoe meer of Jan Alleman dalk uiteindelik vir die skade sal moet opdok.
“Dit is ongelukkig so dat dit uiteindelik die belastingbetalers is wat die rekening moet betaal, tensy die stadsraad genoeg bewyse kan kry om ’n munisipale werknemer vir bepaalde skade verantwoordelik te hou,” het Kylie Hatton, woordvoerder van die Kaapse stadsraad, Woensdag gesê.
Maatreëls wat die stadsraad kan oorweeg, sluit in tugstappe teen werknemers wat noodsaaklike dienste moet verrig en dan onwettig staak, asook tugstappe indien bewys kan word dat ’n werknemer gewelddadig opgetree het.
“Die groot kwessie is om bewyse te kry,” het Hatton gesê.
In dié stadium van die staking is die meeste geweld in die vorm van intimidasie teenoor werknemers wat nie staak nie, eerder as dat eiendom beskadig word.
Tony Ehrenreich, provinsiale sekretaris van Cosatu, het gesê die stadsraad moet die mense ondersteun wat skade gely het.
“Dit is die stadsraad se verantwoordelikheid om daardie mense te beskerm. Die stadsraad het hulle duidelik in die steek gelaat.”
Hy het gesê daar moet vasgestel word wie vir die geweld verantwoordelik is. “’n Mens kan nie net sê die verantwoordelikheid lê by die vakbond nie. Ons is gekant teen enige misdadige gedrag,” het Ehrenreich gesê.
Samwu se provinsiale sekretaris, André Adams, het in ’n verklaring gesê die media het oorreageer. “Baie van ons lede is onsigbaar vir die publiek. Hulle maak snags strate skoon en verwyder die vullis. Ons lede doen werk wat baie kommentators nie sal droom om te doen nie.”
Volgens Adams moet die werkers dooie diere langs die pad verwyder, rioolpype skoonmaak en in die koue waterpype regmaak.
Hy het gesê die doel van die staking is ook om die “onsigbare” werkers meer sigbaar te maak as mense met gesinne wat ondersteun moet word. Vullisverwyderaars wat asblikke omgooi, doen dit dalk om sigbaar te wees en die aandag op hul lot te vestig.
– Volg Nuus24 op Twitter
- Die Burger