Gordhan waarsku oor belasting-inkomste
2011-10-25 15:30
Kaapstad – Pravin Gordhan, minister van finansies, het Dinsdag in sy mediumtermynbegrotingsraamwerk gesê die regering oorweeg beleidsveranderings om belastinginkomste te verhoog indien die ekonomie nie na wense presteer nie.
Dié uitlating kom ná die nuus dat die tesourie se verwagte inkomste uit belasting met R13 miljard afwaarts aangepas moes word, van R741,6 miljard tot R728,6 miljard.
Gordhan het die regering se finansiële planne vir die volgende drie jaar in sy toespraak uitgestippel.
Die ekonomiese groeikoers vir 2011 is afwaarts aangepas tot 3.1%, en sal na verwagting in 2012 tot 3.4% styg. Die groeikoers sal na verwagting in 2013 4.1% wees, terwyl dit in 2014 na raming 4.3% sal wees.
Die verbruikersprysindeks (CPI) sal na verwagting in 2011 gemiddeld 5% wees, en vir die volgende drie jaar onder 6% bly. Dit is binne die regering se mikpunt van 3% tot 6%.
Die tekort op die lopende rekening sal oor die volgende drie jaar styg van 3.4% van die bruto binnelandse produk (BBP) in 2011 tot 3.8% volgende jaar en 4.2% in 2014.
Die tesourie beplan ook om die begrotingstekort na 3.3% te verminder in die 2014/15- finansiële jaar, vanaf 5.5% in 2011/12.
Gordhan het ook gesê dat die tesourie se totale inkomste as 'n persentasie van die BBP 'n geringe daling kan toon van 'n beraamde 27.3% in 2011/12 tot 27.0% in 2012/13, voor dit in 2014/15 styg na 27.7% .
Hy het voorts gesê die tesourie sal R25 miljard oor ses jaar voorsien om die ekonomie te steun. Dié pakket sal gebruik word vir infrastruktuurbesteding, die skep van nywerheidsontwikkelingsones, en om die oorgang na 'n groener ekonomie te befonds.
– Volg Nuus24 op Twitter.
