Bekendes en politici woon Zuma-troue by
2010-01-04 17:38
Durban – Politici, bekendes en die voormalige president Nelson Mandela se kleinseun, Nkosi Mandla Mandela, was onder die gaste wat Maandag van oor die hele Suid-Afrika heen by pres. Jacob Zuma se huis in Nkandla saamgekom het om te kyk hoe hy vir die vyfde keer voor die kansel staan.
Zuma het met Thobeka Madiba getrou in 'n kleurvolle tradisionele seremonie wat talle gaste en lede van die media gelok het.
Gaste is getrakteer op tradisionele Zoeloe- en Xhosa-danse, en die president en sy vrou het ook 'n paar passies uitgevoer.
Zuma het tydens die troue saam met lede van sy familie en KwaZulu-Natal se premier, Zweli Mkhize, gesit.
Sekuriteitsmaatreëls was streng en joernaliste is verbied om naby die president se woning te kom.
Lede van die media wat reeds sedert die vroeë oggendure naby pres. Zuma se tuiste gewag het is egter toegelaat om die seremonie by te woon.