Bekende aktivis wil ANC verlaat oor Zuma

2012-11-28 10:43

Johannesburg – Die aktivis Zachie Achmat sal sy lidmaatskap van die ANC opgee indien pres. Jacob Zuma vir ‘n tweede termyn as leier van die regerende party verkies word.

“As Zuma verkies word, sal ek nie langer lid van die ANC wees nie,” het hy aan Beeld gesê.

Achmat, stigter van die Treatment Action Campaign (TAC) en deesdae onder meer ook kampvegter vir plaaswerkers se regte, sê die president is besig om die land rot en kaal te steel.

“Die party het ’n leier nodig wat integriteit het, wat nie huiwer om op te tree teen korrupsie nie en wat bo verdenking is.”

Achmat sê daar is reeds bewyse in ’n hof wat Zuma direk aan korrupsie koppel.

“Schabir Shaik is tronk toe vir ’n korrupte verhouding met Zuma... Nou sien ’n mens ook die hele Nkandla-besigheid wat op die lappe kom. Die president is nie langer verdedigbaar nie. Die ANC is nie meer die party waarby ek in 1980 aangesluit het nie.”

Achmat het hom ook uitgespreek teen Gwede Mantashe, sekretaris-generaal van die ANC.

Hy sê terwyl ANC-lede bang is vir Mantashe, is daar byna niemand buite die party wat agting vir hom het nie.

“Die sektretaris-generaal is die persoon wat die party se lede tot orde moet roep. Hy moet byvoorbeeld aksie neem teen lede wat korrup optree, maar doen dit selde, indien ooit.”

Volg Nuus24 op Twitter  

- SAPA