Bekende Bfn-vrou dood in motor gekry
2010-06-02 06:57
Bloemfontein– Die bekende Pinkie Pelser (38) is dood in ’n motor agter ’n vulstasie langs die N1 in die Ferreira-omgewing by Bloemfontein gekry nadat sy vermoedelik selfmoord gepleeg het.
Lt.kol. Annelie Wrensch, hoofwoordvoerder van die Parkweg-polisiekantoor, sê mense van die omgewing het gisteroggend op haar in die motor afgekom toe hulle gaan kyk het of iets fout is.
’n Pyp was van die uitlaatstelsel na binne die motor gekoppel.
Die motor se masjien het nie meer geloop nie, want die brandstof was op. Sy was vermoedelik al sedert Maandagnag daar. In die motor het die polisie ook drank en pille gekry.
Wrensch sê geen misdaad word vermoed nie. Die mense by wie sy gewoon het, het Pelser glo Maandag laas gesien. Pelser laat ’n seun en ’n dogter agter.
* Pelser was in 2006 gereeld in die nuus ná ’n beweerde stormagtige verhouding met Mike Pieterse, bekende sakeman van Bloemfontein en eggenoot van mev. Zola Budd-Pieterse, bekende langafstandatleet.
Die Pieterses het intussen versoen en woon nou in Amerika.
Daarna het sy in dieselfde jaar aan Neels Bothma, sakeman van die Awimaweh-oord by Tweespruit, verloof geraak. Dié verlowing het enkele maande geduur voordat sy die verloofring vir hom teruggegee het.
- Volksblad
Volg Nuus24 op Twitter
- Volksblad