Bejaarde vrou op plaas vermoor
2010-12-03 15:19
Johannesburg – ‘n 63-jarige vrou is dood en haar man ernstig beseer tydens ‘n aanval op hul plaas naby Moedwil buite Rustenburg, het die departement van gemeenskapsveiligheid in Noordwes Vrydag gesê.
“Die bejaarde vrou en haar 62-jarige man is Donderdagmiddag omstreeks 16:00 op hulle plaas, Hartbeesfontein, aangeval,” het Lesiba Moses Kgwele, woordvoerder, in ‘n verklaring gesê.
Na bewering was die paartjie se hande en voete met elektriese kabels vasgebind.
Die man kon daarin slaag om te ontsnap en het sy plaaswerkers gevra om hulp te ontbied. Hy is in die Peglerae-hospitaal opgeneem met ernstige hoofbeserings.
Ses vuurwapens, drie selfone en die egpaar se bakkie is tydens die voorval gesteel.
Die polisie het nou ‘n reuse-soektog van stapel gestuur om die verdagtes vas te trek.
Volg Nuus24 op Twitter.
- SAPA