Bejaarde vrou erg aangerand, vermoor

2012-11-26 13:01

Johannesburg – 'n Bejaarde vrou en geliefde inwoner van Boksburg is verlede week in haar huis oorval en vermoor.

Beeld berig ‘n huurder wat in ‘n kothuis op Annette Muller-Botha (74) se eiendom gewoon het, het op haar lyk afgekom.

Volgens die oorledene se dogter, Linda Naudé, het haar ma gruwelike beserings opgedoen.

“Hulle het haar verskriklik seergemaak; haar gesig stukkend geslaan. Hulle het ’n hele slaapbroek in haar mond ingedruk, haar lippe geskeur.

“Sy is met die elektriese koord van haar TV vasgebind en met haar sykouse verwurg.”

‘n Koevoet, lang mes en ‘n moersleutel het langs haar lyk gelê.

Naudé sê die aanvallers het vier deure oopgebreek om in die slaapkamer te kom.

Muller-Botha se selfoon, juweliersware, ’n bietjie geld, bankkaarte en die huis en haar motor se sleutels is gesteel.

Sy was ’n verpleegster en ‘n enkel-ouer wat vier dogters grootgemaak het.

Volg Nuus24 op Twitter  

- SAPA