Bejaarde voetganger in Soweto doodgery

2012-08-13 15:33

Johannesburg – ‘n Bejaarde man is dood nadat hy deur ‘n bakkie getref is terwyl hy Maandagoggend die N17 naby Orlando-wes in Soweto probeer oorsteek het, het Johannesburg se nooddienste gesê.

Volgens Synock Matobako, woordvoerder vir die nooddienste, het die man omstreeks 07:30 die pad probeer oorsteek toe hy deur ‘n bakkie getref is wat teen ‘n hoë spoed op die pad gery het.

Hy is op die toneel dood verklaar.

Daar is geen brug oor die hoofweg in daardie omgewing nie, maar ‘n muur is gebou om mense te verhoed om die pad oor te steek, het hy gesê.

“Ongelukkig is daar ‘n gaping in die muur waar mense deurloop.”

Matobako het ‘n beroep gedoen op voetgangers om nie hoofpaaie onwettig oor te steek nie en het motoriste gevra om versigtig te wees in omgewings waar daar voetgangers kan wees.

– Volg Nuus24 op Twitter

 

- SAPA