Bejaarde vermoor in rooftog
2010-03-05 19:02
Johannesburg – ‘n 68-jarige man is vroeg Vrydagoggend op sy kleinhoewe in Mullerstuine naby Barrage gedurende ‘n gewapende rooftog vermoor, het polisie in Gauteng gesê.
Robert Hunter, wat aan Parkinson se siekte, sowel as been- en gewrigsiektes gely het, is kort na 05:00 deur sy seun gevind, het insp. Kinnie Steyn gesê.
Die seun, Freddy Hunter, wat in ‘n ander huis op dieselfde erf woon, het wakker geword en drie mans gesien wat probeer het om sy pa se motor te steel.
Die mans het gevlug nadat hy verskeie waarskuwingskote gevuur het.
Hy het ;’n sekuriteitsmaatskappy gekontak en saam met hulle by sy pa se huis ingegaan.
Robert Hunter se lyk is met ‘n groot wond in sy bors gevind wat deur ‘n skerp voorwerp veroorsaak is.
Hulle het ‘n jaggeweer en ‘n haelgeweer langs sy pa se motor gevind.
Verskeie sakke met kruideniersware is heelwat later in ‘n aangrensende veld gevind.
Polisie het binne ure drie mans in hegtenis geneem.
Hulle het ‘n haelgeweer, selfone en juweliersware in hulle besit gehad.
Die mans word ook gesoek vir ander gewapende rooftogte in die omgewing.
Hulle sal Maandag in die landdroshof in Vanderbijlpark verskyn.
- Sapa