Bejaarde se lyk in tas onder bed gevind
2010-01-20 18:48
Kaapstad - Die lyk van ‘n 65-jarige vrou is versteek in ‘n tas onder haar bed in haar woonstelblok in Strand gevind, het polisie Woensdag gesê.
“Ons vermoed dat sy Sondag vermoor is want haar lyk sal amper begin ontbind,” het insp. Olebogeng Tawana gesê.
Die vrou se lyk is Dinsdag gevind nadat inwoners van die woonstelblik bekommerd geraak het en die polisie gekontak het omdat hulle die vrou Saterdag laas gesien het.
“Sy was ‘n bekende pianis by die Welgeleegen woonstelblok. Nie ‘n dag het verbygegaan wat sy nie musiek gespeel het nie,” het Tawana gesê.
Die vrou se naam kon nie bekend gemaak word nie omdat haar naasbestaandes nog nie in kennis gestel is nie. Die laaie en deure van haar kaste was oop en haar klere was oor die vloer gegooi.
Volgens polisie is ‘n 25-jarige vrou in hegtenis geneem nadat sy glo ‘n tjek van R2000 met die slagoffer se handtekening op wou laat uitbetaal. Sy is in die woonstelblok gevind en het aan polisie gesê dat sy die huis oppas omdat die eienaar weg was.
Die polisie is na die bank geroep voor die lyk ontdek is en vermoed dat die vrou daar was om van die lyk onstale te raak.
Sy sal in die hof verskyn op aanklag van moord, diefstal en bedrog. Polisie ondersoek ook haar moontlike verbintenis met ander misdade wat in die Tafelsig area gepleeg is.
Behalwe vir ringe wat van die slagoffers se vingers verdwyn het is dit nie bekend wat van haar woonstel gesteel is nie.
- Sapa