Bejaarde paartjie in hof vir moord op kleinkind
2011-09-27 20:09
Bloemfontein – ‘n Bejaarde paartjie het Dinsdag in die Thaba Nchu-landdroshof verskyn ná die moord op hul negejarige kleunseun en die poging tot moord op sy tweelingsuster, het die polisie in die Vrystaat gesê.
Volgens konst. Consolation Mokoale is die 68-jarige vrou en die 70-jarige man in hegtenis geneem vir die moord op die seun en die aanranding van die meisie, wat albei in hul sorg was.
Die kind se ma is in Januarie dood.
Die bejaarde man en vrou is Sondag in hegtenis geneem op ‘n plaas naby Thaba Nchu nadat die beseerde meisie ‘n verklaring by die polisie afgelê het.
Die polisie in Selosesha is ingelig dat die seun op 13 September op die plaas gesterf het nadat hy aangerand is.
Die meisie, wat ernstig beseer is, was Dinsdag nog in die Pelonomi-hospitaal.
Die hof het die saak tot 5 Oktober uitgestel vir die paartjie se borgtogaansoek. Hulle bly in aanhouding.
Volgens Mokoale sal die paartjie ook van dwarsboming van die gereg aangekla word.
- Volg Nuus24 op Twitter
- SAPA