Bejaarde man op kleinhoewe vermoor
2011-07-19 23:09
Johannesburg – ‘n Vier-en-sewentigjarige Hongaarse man is aangeval en vermoor op sy kleinhoewe in Zuurbekom, Westonaria, het die polisie Dinsdag gesê.
Twee mans het hom Maandagnag buite sy huis met 'n piksteel aangeval, het konst. Mariaan Bam gesê. Hy is dood weens ‘n kopbesering.
Die man se negejarige seun het sy gille gehoor, die huis se deur gesluit en weggekruip. Hy is nie beseer nie.
Volgens Bam het die moordenaars ‘n venster gebreek, sleutels van binne die deur gegryp en die huis betree.
Hulle het ‘n onbekende hoeveelheid geld uit die kluis gesteel en die huis vir ander waardevolle items deursoek voordat hulle gevlug het.
Niemand is nog in hegtenis geneem nie.
- Volg Nuus24 op Twitter