Bejaarde in erge aanval beroof
2010-11-09 09:12
Volksblad
Kroonstad - Rowers het ’n bejaarde man só erg in die Kroonstadse middedorp aangerand dat hy ’n ruk lank bewusteloos op ’n sypaadjie gelê het.
Die drie aanvallers wat die weerlose Niek Conradie (64) helder oordag van R22 000 beroof het, het hom hardhandig rondgeruk. Hy is selfs met pepersproei in sy oë gespuit.
Die pepersproei het soos ’n kool vuur gebrand, het Conradie Maandag aan Volksblad gesê.
Voor die aanval het Conradie ’n seer heup gehad wat reeds goed herstel het.
Nou het hy van nuuts af pyn – dié keer aan die ander kant van sy heup.
Sy rug is “ongelooflik” seer en sy kop het ’n knop.
Conradie was Vrydag op pad om dié geld van die melkverspreidingsdepot, waar sy vrou Ina werk, by die bank te gaan inbetaal.
Hy doen dit reeds jare lank vir ’n “petrolgeldjie elke twee weke” en om hom besig te hou.
Volgens Conradie het hy het dié geld in ’n verseëlde banksak binne-in ’n sportsak gehad.
Hy was paraat en het eers rondgekyk voordat hy in Presidentstraat uit sy voertuig geklim het.
“Buite die motor het ’n onbekende aantal mans op my toegesak, die sak gegryp en my rondgeruk en -pluk.” Hy is toe met pepersproei in sy gesig gespuit.
“Ek het ’n bril opgehad. Hulle was só slim, hulle het langs die kant van die bril ingespuit.”
Conradie sê hy het sy bewussyn verloor. Hy het ’n rukkie later vanself bygekom en in sy voertuig gaan klim. “Almal moes dit gesien het, maar niemand het my kom help nie. ’n Man het net later vir my my bril gebring wat op die sypaadjie agtergebly het.”
Die onderneming gebruik van vandag ’n geldvervoermaatskappy om sy geld na die bank te bring.
Kapt. Msisitheki Selima, woordvoerder van die polisie op Kroonstad, het dié rooftog bevestig. Volgens Selima was drie rowers betrokke en is hulle nog soek.
Kol. Morné de Wet, stasiebevelvoerder van die Kroonstad-polisie, het Maandag ernstig benadruk ondernemings moet liefs sekuriteitsmaatskappye se diens gebruik as hulle geld wil gaan inbetaal.
- Volksblad