Bejaarde boer se ontbinde lyk op plaas gevind

2012-11-15 13:23

Johannesburg – ‘n Bejaarde man se ontbinde lyk is op sy plaas in die Noordwes gevind, het die polisie gesê.

Kapt. Amanda Funani sê Walter Niedinder se halfkaal lyk is Woensdag sowat 40 m van sy plaas in Brakfontein gevind. Sy bure het op sy lyk afgekom.

Die woordvoerder sê die polisie weet nog nie wanneer en hoe Niedinder (70) vermoor is nie.

Sy plaas is in die Buffelshoek-gebied, wat naby Mafikeng geleë is.

Funani sê die boer en ‘n vriend het die naweek na bewering ‘n onderonsie gehad.

“Niedinder se vriend is steeds vermis en sy doen en late is onbekend.”

Die boer se blou Mercedes Benz, ‘n TV en ‘n DVD-speler is weg.

Niemand is tot dusver in hegtenis geneem nie.

Polisiebeamptes ondersoek sake van moord, diefstal en huisbraak.

Volg Nuus24 op Twitter