Bejaarde (92) kry doktorsgraad
2010-07-29 09:00
Bloemfontein - Toe sy in 1976 haar jongste seun by die treinstasie gaan afsien het op pad Stellenbosch toe as eerstejaar, het hy vir haar gesê: “Mamma, moet net nie laat slaplê nie.”
En slaplê het sy beslis nie. Anna de Jager (92) van Bloemfontein het pas gehoor sy het haar doktorsgraad aan die Universiteit van die Vrystaat (UV) verwerf. Dié graad sal sy in September ontvang, ’n maand voordat sy 93 word.
De Jager het gister gesê sy verstaan nie waarom daar ’n bohaai gemaak word nie, want “om te studeer is vir my so natuurlik”.
Die ma van drie seuns, ouma van sewe en oumagrootjie van een, is in 1917 op ’n plaas in die Griekwastad-distrik gebore. Sy en haar man, wat vier jaar gelede oorlede is, dr. Aap de Jager, op sy dag legendariese onderwyser en politikus, het in 1993 na Bloemfontein verhuis om naby ’n universtiteit te wees.
Hy het sy doktorsgraad in geskiedenis aan die UV behaal met die Die geskiedenis van die Vaalharts-besproeiingskema.
De Jager se studie het op die ouderdom van 58 begin nadat haar jongste kind uit die huis is. Sy het haar ingeskryf vir ’n BA-graad in sielkunde en kriminologie.
“Die een ding het tot die volgende gelei en ek wou graag net aanhou studeer. My man se studie het my geïnspireer. En ek wou my graag met iets nuttigs besig hou.”
Haar doktorsgraad het sy nou in teologie verwerf ná haar navorsing oor die mate van geloofsbetrokkenheid van die huidige Afrikaansprekende adolessent.
“My bevinding is jong mense is steeds absolute Christene.”
Maar hoe kry ’n bejaarde persoon dit reg om steeds so helder van gedagtes te wees en soveel lus vir die lewe te hê?
“Deur genade van Bo. En om fisiek en geestelik aktief te wees.”
Sy klim nog gereeld die sewe verdiepings trappe na haar woonstel toe en ry elke oggend op haar oefenfiets.
Sy woon nou wel alleen, maar hoop nie sy hoef ooit na ’n tehuis vir bejaardes te gaan nie.
“Ek gebruik huurmotors om my rond te karwei. Dit sal goed wees as alle bejaardes dit begin doen.”
Oor wat volgende vir haar voorlê, is sy nog nie seker nie.
“Maar ek sal iets moet kry om te doen, ek is reeds besig om verveeld te raak.”
- Volksblad