Bejaarde (91) in haar huis verkrag

2012-10-06 09:58

Pietermaritzburg – Die polisie het sy teenwoordigheid in die Hayfields-gebied van Pietermaritzburg verhoog ná 'n 91-jarige vrou Vrydag in haar huis verkrag is, het The Witness Saterdag berig.

Die vrou was alleen by die huis toe sy verkrag is.

Die vrou se familie en bure is geskok deur die aanval, en kon nie verklaar hoe die man toegang tot die huis gekry het nie.

“Hierdie is 'n huis met 'n goeie heining en sekerheidstelsel. Hoe het hierdie man in die erf gekom?” het die bure op die toneel gevra.

Die slagoffer was duidelik in skok, en is na 'n nabygeleë hospitaal geneem.

Polisiebeamptes het hulle na die N3 gehaas en 'n honde-eenheid uitgeroep ná 'n sekerheidswag op die toneel aan die polisie gesê het hy het 'n man met 'n sak op die N3 sien loop. Die man is opgespoor, maar het nie ooreengestem met die beskrywing van die aanvaller nie en is later vrygelaat. Hy het ook nie enige van die items wat uit die vrou se huis gesteel is, in sy besit gehad nie.

Die polisie het inwoners gevra om paraat te wees en om hulle te kontak indien enigiemand verdag opgemerk word.

– Lees hier meer.

– Volg Nuus24 op Twitter.