Begrafnisondernemer vas ná hy lyk verhuur
2012-12-24 17:45
Johannesburg – 'n Begrafnisondernemer en 'n vrou is naby Umbilo, Durban, in hegtenis geneem nadat hulle glo 'n lyk gebruik het om van 'n lewensversekeringspolis te eis, het die polisie Maandag gesê.
Die 35-jarige vrou het na bewering 'n geboortesertifikaat van 'n persoon, genaamd Aphiwe Ntombela, vervals, het kol. Vincent Mdunge, polisiewoordvoerder, gesê.
Sy het toe drie lewensversekeringspolisse van sowat R950 000 in die persoon se naam uitgeneem en 'n aantal maandelikse betalings gemaak.
"Toe sy van die polisse kon eis, het sy 'n probleem gehad, want sy moes iemand doodmaak wat nie bestaan nie," het Mdunge gesê.
"Om dié probleem op te los het sy 'n begrafnisondernemer van uMlazi genader en hom gevra om die lyk van 'n vrou te leen sodat die dokter die lyk kan ondersoek."
Verlede Woensdag het die begrafnisondernemer 'n vrou se lyk uit sy lykhuis na die eThekwini-lykhuis geneem, waar hy gesê het dit is die lyk van Aphiwe Ntombela.
"Die dokter het die lyk gesien en die vrou dood verklaar."
Die vrou het die doodsertifikaat gebruik om van die lewensversekeringspolisse te eis.
Die begrafnisondernemer sou Vrydag terugkeer om die vrou se lyk te kom haal, sodat haar regte familie haar kan begrawe.
Die polisie het 'n wenk ontvang oor die slenter en het die begrafnisondernemer by die eThekwini-lykhuis ingewag en hom in hegtenis geneem.
Volgens die woordvoerder is die vrou, wat die polisse uitgeneem het, ook in hegtenis geneem.
Die twee verskyn Maandag op aanklag van bedrog in die Durbanse handelshof.
– Volg Nuus24 op Twitter
- SAPA
