Bees se beursie: Man kry vonnis
2011-11-11 09:06
Johannesburg – Nog ’n man wat die gewese Blou Bul-stut Bees Roux se beursie gesteel het terwyl hy en ’n Tshwane-metropolisielid handgemeen geraak het, het Donderdag skuld beken op aanklag van diefstal en twee van bedrog.
Vusimuzi Ntloko (30) is in die landdroshof in Pretoria kragtens ’n pleitooreenkoms tot ’n boete van R10 000 of 24 maande tronkstraf gevonnis. Die helfte daarvan is vir vyf jaar opgeskort.
Hy is in September verlede jaar gearresteer, ’n paar dae ná die voorval waarin sers. Ntshimane Johannes Mogale (38) dood is.
Meer as R9 000 is met Roux se bankkaarte gesteel.
Bhekizizwe Mbela en Thabang Mokwele en is ook in verband daarmee gearresteer.
Mbela het vroeër skuld op drie aanklagte van bedrog beken en is tot ’n boete van R4 500 of ’n jaar tronkstraf gevonnis.
Ntloko het intussen ook ’n pleitooreenkoms met die staat aangegaan en sy verhoor is van Mokwele s’n geskei.
Mokwele se verhoor is tot volgende jaar uitgestel.
Kas Sami-Kistnan, senior staatsaanklaer, het gesê Ntloko het berou getoon.
Sy prokureur, Moses Mkhabela, het gevra dat Ntloko die boete afbetaal.
Die hof het gelas dat Ntloko Donderdag R2 000 van die boete betaal. Die res moet in paaiemente van R1 000 per maand betaal word.
– Volg Nuus24 op Twitter
- Beeld