Bees Roux-saak na hooggeregshof verwys
2011-02-23 11:53
Pretoria – Die verhoor van die Blou Bul-rugbyspeler Bees Roux sal vanaf 1 Augustus vir vyf dae in die Pretoriase hooggeregshof plaasvind.
Roux het Woensdag in die Pretoriase landdroshof verskyn.
Sy regspan het Woensdag gesê hulle het 'n afskrif van die klagstaat en 'n opsomming van belangrike feite van die staatsaanklaer gekry, berig Sapa.
Landdros Desmond Nair het Roux se borgtog van R100 000 verleng.
Nair het vroeër 'n bevel toegestaan wat dié bedrag in 'n waarborg omskep waarvoor Roux se regsverteenwoordiger, Rudi Krause, se firma verantwoordelik is indien hy sy borgtogvoorwaardes verontagsaam.
Roux se vriendin en twee ander mans het hom Woensdag na die hof vergesel.
Die 28-jarige Roux staan tereg op 'n aanklag van moord nadat hy op 27 Augustus verlede jaar in hegtenis geneem is.
Die lyk van 'n Tshwane-metropolisieman, Johannes Mogale, is vroeër met kopbeserings in Schoemanstraat in Pretoria gevind. Hy het Roux na bewering voorgekeer weens beweerde dronkbestuur.
Volg Nuus24 op Twitter
- Nuus24