Bees Roux: Onderhandelings in 'finale fase'
2011-09-09 12:10
Pretoria – Die moordverhoor van die Blou Bul-rugbyspeler Bees Roux is Vrydag wéér vertraag en sal na verwagting eers ná middagete hervat word.
Regter Nomonde Mngqibisa-Thusi het die saak, met toestemming van die staat en verdediging, tot 14:00 uitgestel en het gesê onderhandelings is "in die finale fase".
Geen van die partye is bereid om te bevestig dat hul onderhandelinge 'n moontlike pleitooreenkoms insluit nie.
Die verhoor is al twee keer tevore uitgestel vir die partye om 'n ooreenkoms te bereik.
Carien du Toit, Roux se vriendin, het ook die verrigtinge bygewoon.
Roux staan tereg op aanklag van moord nadat hy glo 'n metropolisiebeampte, sers. Ntshimane Johannes Mogale (38), in Augustus verlede jaar doodgeslaan het.
Die voorval het plaasgevind nadat Roux na bewering deur Mogale afgetrek is vir beweerde dronkbestuur.
Roux het tydens sy borgtogaansoek in 'n beëdigde verklaring gesê hy het Mogale aangerand terwyl hy homself teen diefstal en 'n gepoogde rooftog (deur Mogale) beskerm het. Hy het aangedui dat hy onskuldig sal pleit op aanklag van moord.
– Volg Nuus24 op Twitter
- SAPA